2019.04 - 伊朗之旅 - 出發前的安排

對很多人而言伊朗是個神秘的國度，中東給人的感覺是戰亂，然而進入伊朗其實是另一個景像，人民普遍十分熱情好客，只在第一天已深深感受到，街上人民熱情地與我們交談，但是伊朗是一個男女分明的國家，so far 得男人主動同我傾偈。

在安排行程期間，有感網上並未有好完善的資料，所以特別留下以下記錄 (內容是今次自己行程的安排，並非廣告) 。

伊朗系列會有以下部分，方便大家參考
1 出發前的安排（申請簽證，機票，保險，酒店及交通）
2 各個城市的景點及相關感想

申請簽證
過程簡單，過程如下
1. 先到伊朗領事館網站登記，完成登記後，佢會有電郵俾你，如果用Gmail，電郵就會自動跌入垃圾桶 ；
2. 到中國銀行交錢，2019年的費用為 HKD603 ；
3. 到伊朗領事館交護照，簽證3個工作天就可以做好。



小小分享 : 申請簽證期間要上載相片，可以自己影 ； 上到去攞簽證時，因為是朋友代攞，事先準備咗授權書，最後職員睇都唔洗睇。

機票
香港同伊朗無直航，要在多哈或杜拜轉機，機票約HKD10,000，貴過唔少去歐洲的機票。之後我發現咗原來Asia miles 可以兌換到達卡航空由香港到伊朗的機票，只需要要50,000及稅，平咗好多，可能因為地點冷門，我在4個月前還可以兌換到，大家都可以留意。

保險
往伊朗旅遊程，我唔可以單獨投買去伊朗的保險，要買包括全球旅遊地點的保險，今次選擇了歐洲的保險公司AXA。

酒店
因為美國的制裁，我在旅行網站唔可以預訂伊朗的酒店，要先上TripAdvisor 先睇唔同旅客的評價，再與酒店聯絡。下面是我今次旅行的酒店/民宿/旅館 ：
德黑蘭 Hi Tehran Hostel
卡尚 Saraye Amir Kashan
伊斯法罕 Narcis B & B
雅茲德 Jungle Hotel
設拉子 Sasan Hotel

小小分享 ：
在預訂酒店時，多數是入住後再付款，酒店多數收歐羅。但在預訂卡尚和設拉子的酒店時，我則是用信用卡付款，交易是由一個叫apochi 的網站提供。

今次預訂的伊朗酒店，服務水平大約是中國的平價賓館，好乾淨，但硬件唔算好好，如床太硬，水壓唔夠等。仲有，伊朗唔係間間酒店都有冷氣，幸好4月伊朗晚上的氣溫約為15-20度，唔洗開冷氣。

雖然硬件唔夠好，但是服務員全部都好熱心，感覺唔錯。

交通安排
伊朗國內的交通唔算好發達，城市與城市之間都是以巴士為主，但班次好密，去熱門城市約每1個小時一班，但在網上沒有好完整的資料，要靠酒店幫手訂飛，加上巴士站多在城市的外圍，到酒店要再駁的士，今次我選擇了包車，省卻了四處找巴士及言語不通等問題。

這是我們的黑色SUV，車的質素好好，新同冷氣夠，坐得好舒服，司機略懂英文。我在微信做預約，接頭人用中文溝通，約定了包7日車，每天110美元，接頭人會把行程翻譯成波斯語，唔洗煩。

去到伊朗先發現，當地包車的價錢大約60美元1日，我們在旅行後期，經酒店額外包了半日車，但車輛無冷氣及司機除咗數字外，可以話是唔識英文。